Poet : Rafeeq Ahmed

ചെമ്പോത്തുകൾ മുട്ടയിടുന്നോരിടവും തേടി നടന്നു 

തലവെന്തൊരു തെങ്ങിൻ കുറ്റികൾ 

യക്ഷിയൊഴിഞ്ഞ  വിഷാദം മുറ്റി-

യുണങ്ങിപ്പോയ കരിമ്പന കണ്ടു.

കാറ്റുകളോരിയിടുന്ന  നടുപ്പാതിരയിൽ

ഊറ്റുപിടച്ചിലലയും  ചെമ്പോത്തിനെ 

സ്വപ്നം കണ്ടു

നീല പൊന്മകളിണ ചേരുന്നോരിടവും തേടി നടന്നൂ 

വക്ക് കരിഞ്ഞൊരു ചന്ദ്രൻ, വറ്റി 

വസൂരിപ്പാടുള്ള തടാകക്കരയിൽ

കുത്തിയിരിക്കെ,

മീൻമുള്ളുകളാൽ തീർത്തതൊരു കൂട്ടിൽ 

ചിറകുകൾ കൊണ്ടവ പുണരവേ 

തൂവലടർന്നു പൊഴിഞ്ഞലയുന്നത് 

സ്വപ്നം കണ്ടു 

തേൻ കുരുവികളുടെ പൂമ്പാറ്റകളുടെ 

വീടും തിരഞ്ഞു നടന്നൂ

മലയണ്ണാന് പഴം കരുതുന്നൊരു മരവും തേടി

ഇലകളൊഴിഞ്ഞ മുരിക്കിൻ കൊമ്പുകൾ

നിലവിളിയോടെ വിറച്ചുലയുന്നത് 

സ്വപ്നം കണ്ടു

ഒച്ചുകൾ ഭയമില്ലാതെയുറങ്ങും  മെത്ത 

ബലിക്കാക്കകളുടെ ക്ഷേത്രം 

ഈയ്യാംപാറ്റകൾ ചിറകുകൾ നെയ്യും തറികൾ 

തിരഞ്ഞു നടന്നൂ-

മിന്നാമിന്നികൾ പകലൊത്തൊളിയും മൺകുടം 

മുയലുകളുടെ പള്ളിക്കൂടം 

വെള്ള കൊറ്റിയുടുപ്പ് തിരുമ്പിയലക്കുമിടം 

വില്ലൂന്നിപ്പാമ്പുണ്ണിയെ താരാട്ടുന്നൊരിലത്തൊട്ടിൽ 

ചെങ്കീരികളുടെ ചാരുകസേര 

മുള്ളൻ പന്നികളമ്പുതൊടുപ്പിൻ വിദ്യ പഠിക്കും 

കളരികൾ തേടി നടന്നൂ

ഒടുവിൽ ഒടുവിലൊരത്തിമരത്തിൽ 

അവശേഷിക്കുമൊരിലയുടെയടിയിൽ 

വെയിലിൽ നിന്നുമൊളിച്ച് 

പച്ചഞ്ഞരമ്പിൽ കടിച്ചുപിടിച്ച്

ചുരുണ്ടുകിടക്കും  നിന്നെക്കണ്ടൂ

രചന – റഫിക്  അഹമ്മദ്

ആലാപനം  

നന്ദൻ

ഭാരം

ഉള്ളവയ്ക്കുള്ളതിനേക്കാൾ ഭയങ്കരം 

ഇല്ലാത്തവയ്ക്കുള്ള ഭാരം

നിദ്രയില്ലായ്മയ്ക്ക്, കാഴ്ചയില്ലായ്മയ്ക്ക് 

സമയമില്ലായ്മയ്ക്ക്, ഹൃദയമില്ലായ്മയ്ക്ക്,

സുഖമില്ലയെന്നതിന്, വരികയില്ലെന്നതിന് 

ഒരാൾ പോയ ഒഴിവിന്.

ഇല്ലാത്തവർക്കുള്ളയത്ര കനം വരി-

ല്ലുള്ളവയ്ക്കൊന്നും 

അതാണ് ദൈവത്തിന് 

സ്നേഹത്തി,നർത്ഥത്തിനെല്ലാം

ഇത്രയ്ക്കസഹ്യമാം ഭാരം

 

രചന – റഫിക്  അഹമ്മദ്

ആലാപനം  

നന്ദൻ